दुई वर्ष अगाडी आफ्नै घरको भान्सा कोठामा मृत्त अवस्थामा भेटिएकी हेटौडा उपमहानगरपालिका–४ सूर्यचोककी २६ वर्षीया सुस्मिता क्षेत्री थापाको माइतीपक्षले न्याय दिने अन्तिम समयमा अदालतले आफूहरूलाई बेवास्ता गरेको गुनासो पोखेको छ । शनिबार रिपोर्टर्स क्लब नेपालमा पत्रकार सम्मेलन गर्दै माइती पक्षले न्याय पाउने अन्तिम चरणमा हेटौडा जिल्ला अदालतले आफूहरूलाई बेवास्ता गरेको गुनासो सुनाएको हो ।
पत्रकार सम्मेलनमा बोल्दै मृतक सुस्मिताको ठुलो बुवा हेम बहादुर खड्काले गत फागुन २५ गते अदालतमा पेशीको दिन न्यायालयले गरेको व्यवहारले आफूहरू सशङ्कित भएको बताए । उनले भने,‘गत फागुन २५ गते पेशीको अन्तिम दिन थियो, तर हामीलाई केही नभनीकन न्यायाधीश बेञ्चबाट बाहिरिनु भयो, हामी त हेरेको हेर्यै भयौँ । एक महिला कर्मचारीले २ घण्टापछि पो तपाईंहरूको पेशी स्थगित भयो भन्नु भयो । अब हामी न्यायको अन्तिम चरणमा छौँ ।’
यही चैत्र १४ गते फेरी अर्को पेशी तोकिएको उनले उल्लेख गरे । उनले २ वर्ष बितिसक्दा पनि न्याय प्रक्रियाबारे आजसम्म केही प्रतिक्रिया र गुनासो नगरेको भन्दै आज भने बाध्य भएर छोरीको न्यायको लागि मुख खोल्न परेको सुनाए ।
जवान छोरीको हत्या काण्डको कानुनी प्रक्रियामा भइरहेको ढिलाईबारे गुनासो पोख्न कपिलवस्तुबाट ३ दिन अघि काठमाडौँ आएको सुनाए ।
मृतक सुस्मिताका बुवा कृष्णबहादुर क्षेत्रीले आफूले माया गरेर हुर्काएर बढाएकी एकमात्र छोरी गुमाएको २ वर्ष बितिसकेको तर न्याय पाउन ढिलाइ भएको गुनासो पोखे । क्षेत्रीले आफ्नो छोरीलाई केटाको परिवार मिलेर भान्छा कोठामा थिचिथिची मारेका हुन भन्ने सबैलाई थाहा हुँदाहुँदै पनि अहिलेसम्म न्याय पाउन नसकेकोमा दुःख व्यक्त गरे । साभार रातोपाटी
