त्रिभुवन विमानस्थलमा टिकट नम्बर मात्रै देखाएर प्रवेश नपाइने, प्रिन्ट वा टिकटको विवरण नै चाहिने

काठमाण्डाै – त्रिभुवन विमानस्थलबाट यात्रा गर्ने आन्तरिक उडानतर्फका यात्रुले अब टिकट नम्बर मात्रै देखाएर प्रवेश नपाउने भएका छन् । अहिलेसम्म मोबाइलमा टिकट नम्बर मात्रै देखाए पुग्नेमा अब टिकट प्रिन्ट गर्नुपर्ने वा पूर्ण विवरणसहितको डिजिटल टिकट देखाउनुपर्ने विमानस्थल कार्यालयले जनाएको छ । केही यात्रुले १० अङ्कको ‘प्यासेन्जर नेम रेकर्ड’ (पीएनआर) मात्रै लिएर विमानस्थलमा जाँदा सुरक्षा संवेदनशीलता बढेको तथा यात्रुको विवरण सङ्कलनमा सुरक्षाकर्मीलाई अप्ठेराे भएको भन्दै प्रिन्ट टिकट बोक्न भनिएको विमानस्थलका महानिर्देशक भोलाप्रसाद गुरागाईंले बताउनुभयो ।मोबाइलमा पीएनआर नम्बर मात्रै बोक्नेहरूलाई कडाइ गरिएको र डिजिटल टिकट नै हुनेहरूको हकमा भने प्रवेश नरोकिएको उहाँको भनाइ छ ।मोबाइलमा डाउनलोड गरिएको पूर्ण विवरणसहितको टिकट भएमा प्रिन्टलाई अनिवार्य नगरिएको विमानस्थल कार्यालयले जनाएको छ । साबार उज्यालो अनलाइन